labido

الانسان لازم يعرف ان سر النجاح هو انك تحب العمل بتاعك وتبدع فيه كدة سكة النجاح والانسان ياما عمل حاجات مش هي الهدف لكن اتوضع في الظروف دي علشان كده لازم يحب شغلة علشان يستحمله ويقدر يعمل حاجة كويسة في حياته.
احيانا الانسان يلاقي نفسة في مكان مكانش مخطط انه يروحة فلازم يبدا يتعامل مع الواقع بموضوعية وبالذات في الاماكن اللي الواحد مايقدرش يغير مكانه فيها بسهولة لازم الواحد يعيش الواقع تماما علشان يقدر يتعامل معاه بدون مشاكل.
انا لما دخلت الجيش كنت مرتب حياتي اني ادخل عسكري مش ضابط لكن ارادة ربنا كانت فوق كل شيء ودخلت ضابط وبعد محاولات كتيرة ماقدرتش اغير الواقع المهم قبل ما اروح كلية الضباط الاحتياط قعدت زعلان وزهقان وقرفان جدا وبعين فكرت زعلي وقرفي وزهقي هل هايغير الواقع .... لا طبعا يبقي ايه الحل ...... لقيت ان الحل هو في عنوان المقال ده .
وبصراحة كانت اجمل سنين قضيتها في الجيش واخدت اكبر خبرة في حياتي كلها بفضل الله.

الواحد لازم يعرف ان الحياة كلها فرص يعني تيجي للواحد فرصة لازم ياخدها وزمان قالت العرب اذا اتتك رياحك فاغتنمها بمعني انت لو لقيت فرصة جاية خدها علي طول واذا كانت كويسة فمعناه ان الفرص اللي وراها احسن وهو طبعا كل شيء بامر الله ولكن ربنا سبحانه وتعالي طلب مننا السعي يعني الحركة واحنا نختار الفرص اللي ناخدها او نسيبها لان الانسان ما يعرفش ايه اللي في الغيب لكن لازم ياخد مبادرة يعني انه يتحرك في الدنيا ويحاول يتقدم ويجرب لان الواحد لو قعد او حط نفسه في حاجة وقال ان ربنا اراد طبعا ارادة ربنا فوق كل شيء لكن ربنا ادانا حرية الاختيار يانختار صح يانختار غلط نوضح شوية انت عندك حرية العبادة او تركها يعني هاتصلي والا لا دا اختيارك والله هاصلي يبقي اخدت الاختيار دة تشوف بعد كدة ايه المطلوب مطلوب طهارة ووضوء والقيام بحركات الصلاة انت عملت دا كله كويس بس فيه حاجة داخلية نيتك ايه وابتعمل دا ليه وهل بتقوم بالحركات دي وانت حاببها واللا منظر وخلاص دي هي المشكلة ولو كنت بتادي وخلاص هاتفضل طول عمرك مؤدي بس ما فيش ترقية ,
نطبق الكلام علي حياتنا العملية (الدنيا يعني) هنلاقي واحد شغال طول عمره في شغلانه ما بيحبهاش ويلعن اليوم اللي اشتغل فيه الشغلانة دي طيب هو عمل ايه عاشان يحسن وضعة وممكن تكون جتلة ميت فرصة ولكنه كان نايم في العسل بيلعن سلسفيل الشغل, لكن فيه غيرة اشتغل معاه نفس الشغلة وبعد كام سنة بقي مدير او اتنقل شغلة احسن ,
ماحدش يقول اصل دا نصيب او مكتوب المكتوب هو اللي انت مالكش دخل فية يعني ما تقدرش تختارة والامثلة كتير ... اسمك... ابوك... امك .... عيلتك .... شكلك .. وهلما جرا . لكن فيه حاجات تقدر تختارها ... شغلك مجهودك في شغلك .. علاقتك بالناس ... طموحك ... تحركك للشغل والعمل ... ونرجع نقول . اعمل اللي تقدر علية ولو حصل غي اللي انت عاوزه فاكيد دا قدر ربنا ونقول قدر الله وما شاء فعل لكن دا مايمنعش المحاولة ولو الطريق اتسد حاول في سكة تانية يعني لاتيأس ابدا.